بحكم إني بشتغل في مراجعة التطبيقات، كان مطلوب مني إني أجرب تطبيق خدمي حكومي بنفسي، وأشوف هل هو فعلًا بيقدم حاجة مفيدة للمستخدم ولا مجرد وجود رقمي وخلاص. والتطبيق كان My NTRA
حملته على موبايلي Vivo Y76 5G بنظام Android 13.
في البداية كان هدفي بسيط: أعرف التطبيق ده تبع ايه، معمول ليه، وإيه نوع الخدمات اللي بيقدمها. وبعد استخدام فعلي للتطبيق والتنقل بين الأقسام والخدمات، أقدر أقول إن التطبيق ده تابع للجهاز القومي لتنظيم الاتصالات المصري، وواضح جدًا إن الهدف منه هو تسهيل الوصول لخدمات الاتصالات وكل ما يخصها سواء للأفراد أو للشركات والمؤسسات.
بداية سهلة وتجربة أولية مريحة
أول حاجة شدتني في التطبيق إن الواجهة كانت سهلة وبسيطة جدًا، ومفيهاش تعقيد أو زحمة عناصر تخلي المستخدم يتوتر من أول دقيقة. أول ما فتحت التطبيق، قدرت أسجل دخول كضيف من غير ما أكتب أي بيانات، ودي كانت خطوة ذكية جدًا من وجهة نظري، لأن في ناس كتير بتحب تتفرج على التطبيق الأول قبل ما تبدأ تدخل بياناتها الشخصية وأنا من الناس دي.
وأثناء التصفح كضيف، قدرت أشوف عدد كويس من الخدمات والأقسام، لكن كان واضح إن فيه خدمات تانية محتاجة تسجيل فعلي. وده منطقي، لأن بعض الخدمات مرتبطة ببيانات المستخدم نفسه أو بخطوطه ومحافظه الإلكترونية، وبالتالي لازم يكون فيه تحقق أكبر من الهوية.
قسم “خدماتي”.. أول مكان حسيت فيه إن التطبيق عملي فعلًا
أكتر قسم شدني في التطبيق كان قسم خدماتي، لأنه القسم اللي حسيت فيه إن التطبيق مش مجرد منصة معلومات، لكنه كمان بيقدم أدوات وخدمات عملية ممكن أي مستخدم يستفيد منها فورًا. وكان بيقدم مجموعة متنوعة من الخدمات مثل:
قياس سرعة الإنترنت
أول خدمة جربتها كانت قياس سرعة الإنترنت، ودي بصراحة كانت من أكتر الحاجات اللي عجبتني. التطبيق عرضلي تفاصيل واضحة عن الشبكة عندي، زي:
- سرعة الـ Ping
- متوسط التنزيل
- أعلى تنزيل
- متوسط التحميل
- أعلى تحميل
الميزة هنا إنك مش بتاخد رقم وخلاص، لكن بتشوف بيانات تساعدك فعليًا تفهم أداء الشبكة عندك بشكل أبسط وأوضح. ودي خدمة مهمة جدًا، خصوصًا إن ناس كتير بتشتكي من الإنترنت من غير ما تبقى عارفة هل المشكلة فعلًا من الشبكة ولا من حاجة تانية.
إلغاء خدمات القيمة المضافة
بعد كده دخلت على خدمة إلغاء القيمة المضافة، ولقيت جوه الخدمة الكود *155#. ودي من الخدمات المفيدة جدًا لأن ناس كتير بيتم خصم رصيد منها بسبب خدمات ترفيهية أو إضافية وهي أصلًا مش مركزة أو مش عارفة تلغيها إزاي. وأنا شخصيا عانيت من المشكلة دي على موبايل والدتي كانت كل ما تشحن يتم خصم رصيدها في حاجات هي مش مشتركة فيها.
وجود الكود بالشكل ده داخل التطبيق بيسهل علي وعلى أي شخص جدًا، خصوصًا إن الخدمة دي شاملة لكل شبكات الاتصالات الأربعة في مصر. يعني بدل ما أدور على الكود أو أسأل عليه، لاقيته موجود قدامي بشكل مباشر.
خطط الأسعار
من الخدمات اللي جربتها كمان كانت خدمة خطط الأسعار، وكان جواها اختيارين. الأول خاص بـ فاتورة الحساب، وده بيقدم نصائح ومعلومات مرتبطة بالفاتورة الشهرية لشركات الاتصالات. أما الاختيار التاني فكان بعنوان كيف أعرف الباقة المناسبة لي.
الفكرة نفسها ممتازة، لأن كتير من المستخدمين بيبقوا مش عارفين يختاروا أنسب باقة لاستهلاكهم، فوجود أداة تساعدهم شيء مهم. لكن في تجربتي الشخصية، كل ما كنت أكتب حاجة جوا الاختيار ده كان التطبيق يرد عليّ بجملة من نوع استخدم محددات أخرى للبحث، وده خلاني أحس إن الجزء ده محتاج تطوير أكتر من ناحية المرونة أو طريقة التفاعل مع المستخدم.
الخدمات اللي محتاجة تسجيل ببيانات كاملة
لما حاولت أدخل على خدمة أرقامي وخدمة المحافظ الإلكترونية، ظهرت لي رسالة بتقول إن الخدمة دي للعملاء المسجلين. وهنا فهمت إن مجرد الدخول برقم الهاتف مش كفاية لبعض الخدمات، وإن لازم المستخدم يكمل تسجيله ببيانات أكثر دقة، وهي الرقم القومي.
وبالفعل كتبت الرقم القومي أثناء التسجيل، وده شيء طبيعي جدًا لأن نوعية الخدمات دي حساسة ومرتبطة ببيانات شخصية ومالية، فلازم يحصل تحقق واضح من هوية المستخدم قبل ما يطلع على التفاصيل.
نقل أرقام المحمول
كمان جربت خدمة نقل أرقام المحمول، وهي خدمة مفيدة جدًا لأي شخص مقدم طلب لتحويل رقمه من شركة لشركة تانية وعايز يتابع حالة الطلب. لكن بما إني ماقدمتش طلب قبل كده، فالتطبيق ببساطة بلغني إنه مفيش طلبات.
رغم إن الخدمة ماقدمتليش إفادة مباشرة في حالتي، لكن وجودها مهم جدًا، لأنها بتوضح إن التطبيق مش بس للتوعية، لكنه كمان مرتبط بإجراءات حقيقية يقدر المستخدم يتابعها بنفسه من الموبايل.
خدمات تانية بتكشف إن التطبيق أكبر من مجرد تطبيق شكاوى
أثناء التصفح، بدأت ألاحظ إن التطبيق فيه خدمات متنوعة فعلًا، وده اللي خلاني أحس إنه معمول بفكرة أوسع من مجرد تقديم شكوى أو الاستفسار عن رقم خدمة.
خدمات أجهزة الاتصالات
لقيت قسم خاص بـ خدمات أجهزة الاتصالات، وفيه إمكانية لمتابعة الطلبات الخاصة ببعض التصاريح. وده نوع من الخدمات اللي ممكن يكون مهم أكثر للمؤسسات أو الفئات المهنية، لكنه في نفس الوقت يوضح إن التطبيق بيحاول يخدم شرائح مختلفة من المستخدمين، مش المستخدم العادي فقط.
المعاهد اللاسلكية
من الحاجات اللي عجبتني فعلًا جوه التطبيق كانت خدمة المعاهد اللاسلكية. لما دخلت عليها لقيت جوه القسم 3 خدمات تانية:
- المعاهد المعتمدة
- البوابة الإلكترونية
- الاستعلام عن رخصة المشغل
ولما ضغطت على خدمة المعاهد المعتمدة، ظهرلي خيار يساعدني أبحث عن المعاهد المتاحة في المنطقة بتاعتي عن طريق الموقع الجغرافي. ودي ميزة ممتازة، لأنها بتخلي الوصول للمعلومة أسهل وأسرع، بدل ما المستخدم يفضل يدور بشكل عشوائي.
وده معناه إن التطبيق مش معمول فقط للاستخدام السريع اليومي، لكنه كمان فيه جوانب مهنية وتعليمية وتنظيمية أوسع.
اهتمام واضح بذوي الهمم.. ودي من أفضل نقاط التطبيق
من أكثر الأشياء اللي احترمتها في التطبيق بصدق هو الاهتمام بذوي الهمم. لقيت إن التطبيق بيوفر لهم إرشادات وتوعية بلغة الإشارة، ودي خطوة جميلة جدًا ومهمة. لكن الأجمل من كده إنه كمان بيسمح لهم بالتواصل وطرح الأسئلة عن طريق تسجيل فيديو بلغة الإشارة.
النقطة دي في رأيي مش مجرد ميزة إضافية، لكنها تعكس وعي حقيقي بفكرة الشمول وإتاحة الخدمة لكل الفئات، وده شيء مهم جدًا في أي تطبيق حكومي أو خدمي. بصراحة، دي من الحاجات اللي خلت انطباعي عن التطبيق إيجابي بشكل واضح.
قسم “معلومات تهمك”.. بسيط لكنه مهم جدًا
من الأقسام اللي حسيتها مفيدة بشكل مباشر لأي شخص هو قسم معلومات تهمك. القسم ده بيجمع الأرقام والأكواد المهمة اللي ممكن نحتاجها في حياتنا اليومية، ودي نقطة ممتازة جدًا.
يعني مثلًا أنا مش حافظة أرقام الطوارئ أو النجدة أو الصحة أو غيرها من الأرقام المهمة، لاقيتها مجمعة بشكل مرتب داخل القسم ده. كمان لقيت فيه أكواد مهمة ممكن أي مستخدم يحتاجها في وقت معين.
الميزة في القسم ده إنه عملي جدًا، ومش محتاج شرح طويل. مجرد إنك تفتحه هتلاقي قدامك معلومات ممكن تنقذك أو تفيدك بسرعة وقت الحاجة.
قسم الشكاوى.. من أهم أقسام التطبيق
أكيد بما إن التطبيق تابع للجهاز القومي لتنظيم الاتصالات، فكان لازم يكون فيه قسم واضح للشكاوى، وده بالفعل موجود. لما دخلت على القسم ده، لقيت خيارات من نوع قدّم شكوتك أو بلّغ.
وجود القسم ده مهم جدًا، لأنه بيحول التطبيق من مجرد وسيلة معلومات إلى قناة تواصل فعلية بين المستخدم والجهة التنظيمية. ودي نقطة فارقة، لأن المستخدم أحيانًا بيكون محتاج يشتكي من خدمة، أو يبلغ عن مشكلة، أو يتابع حق من حقوقه، والتطبيق هنا بيوفر له ده بشكل مباشر.
التطبيق مجاني وخالي من الإعلانات
من الحاجات اللي عجبتني جدًا كمان إن التطبيق مجاني بالكامل، والأهم من ده إنه خالي من الإعلانات تمامًا. ودي نقطة مريحة جدًا في الاستخدام، لأن التطبيقات الرسمية أحيانًا ممكن تكون ثقيلة أو مزعجة بصريًا، لكن هنا التجربة كانت هادئة ومباشرة.
غياب الإعلانات خلّى التطبيق يبان بشكل رسمي ومحترم، وخلّى التركيز كله على الخدمات نفسها من غير أي تشتيت.
رأيي النهائي بعد التجربة
بعد ما جربت التطبيق بشكل عملي ولفيت بين خدماته المختلفة، أقدر أقول إن My NTRA تطبيق مفيد فعلًا، وليس مجرد تطبيق حكومي موجود وخلاص. صحيح إن بعض الأجزاء محتاجة تحسين، خصوصًا في خدمات البحث أو التفاعل داخل بعض الأقسام، لكن بشكل عام التجربة كانت جيدة جدًا.
لكن في النهاية، لو أنت شخص مهتم بخدمات الاتصالات في مصر، أو عايز تطبيق رسمي يجمعلك معلومات وخدمات وأدوات مهمة في مكان واحد، فأعتقد إن التطبيق ده يستحق التجربة فعلًا.